每天限額一百蚊???

兩星期前在獅子銀行開左個儲蓄戶口及申請左提款卡，估唔到還有問題，昨天因網購左貨品，所以用提款卡做轉賬，銀碼一百九十元，但竟然轉唔到，原因係限額一百蚊，一百蚊???即刻打電話到客戶服務中心詢問，服務員聽到我問題後很錯愕話：「一般卡都是預設五萬蚊」，跟住幫我查資料後話，張卡是重設左限額是一百蚊，應是客戶要求才會重設，我話我沒有要求過，就算要求都唔會設定一百蚊咁少吧，邏輯上都唔會啦，服務員話一定要到分行再做設定手續。

今天唯有再行多轉銀行，還等左半個鐘才到我，職員幫我查過，不單轉賬服務，其它服務如提款、交費用等十多項服務全部設定限額都是一佰百，最絶的是全部服務的總額每天都是設定在一百蚊，即是我提左一百蚊後不能再轉賬一蚊，職員直認是開戶口的同事出錯，我有一刻懷疑是否開戶口時因窒過那個職員而給他報復，不過當然無可能呢，應該是新手問題，算吧，我只要求職員反映下問題，避免再有下次。

辦完手續，但都要三個工作天才能生效，只好在櫃位排隊入錢，前後用左個幾鐘才能離開銀行，真麻煩，原本諗住開多個戶口方便啲，估唔到更煩，我還在想好在限額是一百蚊，如果是九十九蚊或以下，這張卡真是不能提款的提款卡了，都唔明點解開個戶口吧，都有咁多麻煩嘢。